SOMJIKAI, DHORM ANI DOYEST – MOG

SOMJIKAI, DHORM ANI DOYEST – MOG

Don Bosco-che porbem somoyar(Janerache 31-tarker), hea sovnsarak, tachea bhov motvachea deniacho ugdas koruya, tem zavn asa tachi xikxannik poddort.

Somjikai (reason), Dhorm (religion) ani Doyest Mog (loving kindness) he tin zaun asat koddegant khambe Don Bosco-che xikxonnik (xikovpache) poddortiche. He poddortik inglez bhaxen  “Preventive System” mhonttat. Hea utracho konknni bhaxentlean sompeponnim anuvad kelo zalear, addhavop vo addhkonn korop, him utram amchea monant rokddinch upzotat. Khorem mhonllear, bariksannin pollelem vo onbovlem zalear amkam khobor astoli, hi poddort addhavpachi vo bhondi ghatlea sarki poddort nhoi.

            Atanchea kallar kai zannanim he poddortik novem nav sodun khadlam, tem zaun asa “the expressive system.” Konknni baxen hea utracho anuvad kelo zalear hea utracho ghost vetolo. Tor ami bore baxen somzoche khatir hanv eka udaronna udexim spoxtt kortam. Peter, ho apleach vadeacho bhurgo. Science vixoi taka somzona mhonn pustok bhair udovnk to sodta. “Preventive” hea utracher ami niyall kelo zalear amkam oxem disunk xokta ki Peter pustok bhair udoitana xikxok taka adaita vo bhair udovnk dina. Punn “expressive” hem utor vaporlem zalear amcho ragrong bodlunk xokta. “Expressive” hea utracho upeog kortana amchea monant vegddench chitr upzota, tem mhonnlear tea bhurgeak somzaupacho, pustokachem ani xikxonnachem mol kollit korpachem, ani mogan fuddle pavtti oxem korchem nhoi mhonn sangchem.

            Hi poddort atanchea kallar khub famad zal’li asa. Don Bosco-cheach xallenim nhoi punn dusrea-i  xallenim  hem podorticho vapor khel’lo amkam disun ieta. Ami avoi-bapainim vo xikxokanim amchea bhurgeank sopurnn xikxonn ditoleanv mhonn bhas diuk zai. Xallek vo kolejik datt’tana ami amchea burgeanche  mon-bud’dikuch nhoi punn somajik, otmik ani kuddichea vhaddponnak mot diunk zai. Ami somzotanv ki  hea soglea vixoiam-cher, Don Bosko-n, zachia zolmachim donnxim vorsam ami gel’lea vorsa sazor kelea, tannem purai toren lox dil’lo asa. To zavn asa he poddorticho “expert” zannkar.